იაპონიაში მომხდარი მიწისძვრის შედეგად დედამიწის ღერძი 10 სანტიმეტრით გადაიხარა , - "გაზეტა.რუ-ს" ცნობით, ამის შესახებ იტალიის გეოფიზიკისა და ვულკანოლოგიის ეროვნული ინსტიტუტი იტყობინება.სეისმოლოგების განცხადებით, დღევანდელმა მოვლენამ დედამიწის ბრუნვის ღერძზე გაცილებით დიდი გავლენა მოახდინა, ვიდრე 2004 წელს სუმატრაზე მომხდარმა მიწისძვრამ, რომელმაც მაშინ დედამიწის ღერძი 6 სანტიმეტრით გადახარა.
იტალიის კოსმოსური სააგენტოს გეოდეზიური ცენტრის სპეციალისტები მიიჩნევენ, რომ თუ რა გავლენა მოახდინა ამ მიწისძვრამ დედამიწის ღერძზე, ზუსტ გამოკვლევას საჭიროებს. იტალიელი მეცნიერები აცხადებენ, რომ დღევანდელი მიწისძვრა იმაზე ნაკლები სიმძლავრისაა, რომელიც 1960 წელს ჩილეში მოხდა. მაშინ მიწისძვრის სიმძლავრემ 9,3-9,5 მაგნიტუდა შეადგინა.
იაპონიაში დღეს 8.9 მაგნიტუდის სიმძლავრის მიწისძვრა მოხდა. ეპიცენტრი ტოკიოს ჩრდილო-აღმოსავლეთით 373 კილომეტრის მოშორებით დაფიქსირდა. მიწისძვრამ ცუნამი გამოიწვია, ტალღების სიმაღლემ 10 მეტრს მიაღწია. კატასტროფას ათასობით ადამიანი ემსხვერპლა.
